Индиската престолнина Њу Делхи е најзагаден град во светот во 2018 година, покажува истражувањето спроведено од две мониторинг организации во 61 град.
По Делхи, каде што живеат 20 милиони луѓе, следат главните градови на Бангладеш и Авганистан, Дака и Кабул.
Анализата е направена во соработка со „Ај кју ер визуел”, швајцарска група која собира податоци за квалитетот на воздухот во целиот свет и меѓународната организација „Гринпис”.
Според истражувањето, загадувањето во Њу Делхи е предизвикано од возилата и индустријата, од градежништвото, чад од домаќинството и од земјоделски отпадоци.
Во 2018 година содржината на фините честички прав во воздухот во еден кубен метар изнесуваше 113,5 микрограми. Тоа е двојно повеќе отколку во Пекинг, каде што средната годишна вредност е 50,9 микрограми. Според тоа, кинеската престолнина е на осмото место во светот по загадување.
