Во Струмица вечерва беше промовирана „Стихозбирка” – збирка од петте книги поезија на поетесата и сликарка Роза Мојсовска, штитеничка на Заводот за заштита и рехабилитација „Бања Банско”.
За авторката промоцијата на нејзината стихозборка е како да ја промовира својата прва книга, иако досега има издадено пет.
-Јас претежно пишувам духовна поезија за мојот спасител, Господ Исус Христос, бидејќи тој ми даде дар да цртам и да творам. Би сакала во иднина да напишам роман, нешто за мене, за мојот живот како го живеам како лице со посебни потреби и се надевам дека ќе успеам со божја сила, рече Мојсовска.
Книгата е во издание на Библиотеката „Благој Јанков Мучето” од Струмица и содржи 222 песни.
-Петте книги се многу вредни за нас како библиотека. Вреди да се слушне поезијата на Роза Мојсовска, но и секој треба да ја има книгата и да ја понесе со себе, рече директорката на струмичката библиотека, Тања Гошева.
Мојсовска своите ликовни и поетски дела ги создава со уста. Имено, таа црта држејќи ја четката во уста, а пишува со уста на специјално адаптиран компјутер.
