Претседателството на Обединети за Македонија во поширок состав, на својата синоќешна седница, донесе едногласна одлука за подршка на заедничкиот кандидат за претседател на Република Северна Македонија, Стево Пендаровски.
„Поддршката на кандидатот зад кој, патем, застанаа триесетина политички партии, за ОМ претставува и продолжување на 2014 и доследност со која Обединети за Македонија застануваат зад обединување и заедништво“, велат од партијата чијшто основач е Љубе Бошкоски.
Претседателството оценува дека во овие извонредно значајни моменти за земјата, од исклучително значење е обединувањето, чија цел се заедничка изградба на стабилно, економски развиено и просперитетно општество.
Поради тоа, додва Обединети за Македонија, од исклучителна важност е Република Северна Македонија да добие претседател кој ќе ги обедини граѓаните, без оглед на нивната национална, етничка или верска припадност, претседател кој ќе соработува со извршната власт, ќе гледа кон иднината и ќе промовира заедништво и реформски капацитети во државата.
