Портпаролката на Европската комисија, Наташа Берто изјави дека Брисел е запознат со гласањето на холандскиот Парламент за суспендирање на безвизниот режим за Албанија, но дека до сега до него не е пристигнало такво барање, јави дописничката на МИА од Брисел.
– Има специфична процедура за механизмот за суспензија и до денеска не сме добиле никакво известување од ниту една земја членка со барање за активирање на механизмот, за која било од земјите кои имаат слободен визен режим, изјави Берто.
Вчера холандскиот Парламент се произнесе за суспензија на безвизниот режим со Албанија поради криминалните активности на албанската мафија во Холандија.
Берто додаде дека доколку пристигне формално барање од која било земја членка, Европската комисија „внимателно ќе го анализира, процени и одреди, во согласност со специфичната процедура и врз основа на сите податоци”, дали е потребно да се суспендира слободниот визен режим за Албанија.
Портпаролката потсети дека Европската комисија објавува редовен извештај за состојбата со визната либерализација во земјите од Западниот Балкан. Последниот извештај, објавен во декември 2018, констатираше дека сите земји од регионот продолжуваат да ги исполнуваат условите за слободно патување во Шенген зоната.
Европската комисија одби да коментира дали и како би се одразило ова барање на Холандија врз очекувањата на Албанија да започне преговори за членство со ЕУ.
-Ги подготвуваме извештаите, кусо прокоментираа извори од Еврокомисијата, без дополнителни објаснувања.
