Под мотото „Да ги отфрлиме стереотипите, а да ја подигнеме свеста за нашите потенцијали и можности”, Центарот за поддршка на лица со интелектуална попреченост „Порака” од Струмица денес организираше хуманитарен хепенинг по повод одбележување на христијанскиот празник Лазарова сабота и претстојните велигденски празници.
На хепенингот беа претставени ракотоворби, украси, велигденски јајца, кошнички за велигденски јајца и други креации со велигденски мотиви, изработени од децата и младинците со интелектуална попреченост и нивните родители-членови на здружението.
-Граѓаните за симболична сума можеа да купат ракотворби и украси, а парите собрани од продажбата на креациите ќе ги искористиме за опремување на Социјалниот Клуб на „Порака” со потребните дидактички материјали за работа, рече Соња Сачевска претседател на организацијата.
Овој настан, како и серијата претходни креативни работилници, се дел од Годишната програма за работа на „Порака” за оваа година.
