Грчкиот премиер Кирјакос Мицотакис претпладнево ќе се сретне со претседателката на Грција, Катерина Сакеларопулу и ќе побара распуштање на Парламентот. Според изборниот закон во Грција, по овој чин започнуваат соодветните процедури за парламентарните избори што треба да се одржат на 21 мај, а Грција и официјално влегува во предизборен период.
Претседателката Сакеларопулу ќе потпише претседателски декрет за распуштање на Парламентот, а одлуката во текот на денот ќе биде закачена на влезната врата на Парламентот.
Потоа, партиите и официјално ја започнуваат четиринеделната предизборна кампања, која неофицијално веќе е во тек имајќи предвид дека, како што објавуваат грчките медиуми, партиските лидери ги интензивираа посетите низ цела Грција на кои држат говори и одржуваат средби со граѓани.
На крајот на март за време на владината седница, грчкиот премиер Мицотакис соопшти дека изборите во Грција ќе се одржат на 21 мај 2023 година.
