Палестинец денеска со автомобил влетал во толпа луѓе на улица во Ерусалим и повредил пет лица пред да биде застрелан од случаен минувач, соопшти полицијата.
Израелските служби за итни случаи соопштија дека наишле на пет повредени лица пред да ги однесат во болница, вклучително и 70-годишен маж кој е во сериозна, но стабилна состојба.
Израелскиот премиер Бенјамин Нетанјаху изјави дека возачот на автомобилот, 30-годишен маж од источен Ерусалим, намерно се обидел да ги убие цивилите.
„Овој терористички напад на ова место, во ова време, нè потсетува дека земјата на Израел и државата Израел се стекнати низ бројни искушенија и неволји“, рече Нетанјаху.
Расте насилството меѓу Израел и Палестина
Израелско-палестинското насилство се интензивираше оваа година. Од јануари досега се убиени повеќе од 90 Палестинци и најмалку 19 Израелци и странски државјани.
Израелските сили убија Палестинец претходно денеска за време на рација во бегалскиот камп Акабат Џабр во близина на градот Ерихон на Западниот Брег. При операцијата било забележано дека двајца осомничени бегаат од местото на настанот. Војниците одговориле со боева муниција, соопшти армијата, но не кажа зошто биле цел Палестинците.
Официјалната палестинска новинска агенција ВАФА ја цитираше изјавата на гувернерот Ерихон дека војниците убиле еден човек, а раниле уште тројца. Здружението кое се залага за палестинските затвореници објави дека израелските безбедносни сили уапсиле 30 лица на Западниот Брег во текот на ноќта и рано утринава. За време на војната во 1967 година, Израел ги окупираше Западниот Брег и Источен Ерусалим, кои Палестинците го сакаат како јадро на нивната идна независна држава.
