Директорот на Јавното претпријатие за државни патишта (ЈПДП) Ејуп Рустеми гарантира изградба на 110-те најавени километри автопат на коридорите 8 и 10д за четири години и седум месеци, со новиот концепт и за проектирање и градба предвиден во Договорот со конзорциумот „Бехтел и Енка“.
На новинарско прашање, Рустеми денеска потсети дека е променет моделот за изградба на патиштата поради повеќегодишното траење на изградбата на клучни инфраструктурни проекти
Сите проекти, посочи Рустеми, што се сега во тек траат осум, десет, па и повеќе години. Затоа како ЈПДП заедно со Министерството за транспорт и врски одлучивме да го менуваме коцептот за изградба на патиштата.
-Тоа е новиот концепт што го склучивме со „Бехтел и Енка и е модифициран црвен ФИДИК за брзо градење. Договорот што го потпишавме има рок, што значи за четири години и сдум месеци ќе изградиме 110 километри автопат. Во овој договор и со овој модел како нов концепт за изградба на патиштата паралелно се одвиваат повеќе активности. Веќе почнавме со геомеханичките испитувања, се одвива и подготовка на елаборати за експропријација, се мобилизираме и веќе почнуваме со проектирање и со мобилизирање на целокупната механизација за градба. Сите овие акции се одвиваат паралелно и тврдиме и гарантираме дека за четири години и седум месеци ќе ги имаме изградено 100 километри автопат, рече Рустеми, кој со премиерот Димитар Ковачевски и министерот за транспорт и врски Благој Бочварски беше на увид на обновата на патот Демир Капија – Неготино.
И премиерот Ковачевски потенцираше дека на двата коридора веќе се вршат неопходните подготвителни активности за градежни работи, геомеханички истражувања, а паралелно, како што рече, течат и процесите на проектирање, израбитка на елаборати за експропријација и мобилизација на фирми што ќе бидат вклучени во изградбата на овие автопатишта.
-Ова е најголемиот инфраструктурен стратешки проект досега со кој ја поврзуваме земјата со регионот, со Европа и по европски и светски стандарди на изградба на патна инфраструктура.
Покрај со Солунското пристаниште се поврзуваме со уште две пристаништа, со Бургас во Бугарија и со Драч во Албанија. Со одлуката на ЕУ за поставување на Коридорот 8 на мапата на главните коридори во регионите на ЕУ нашата држава се позиционира како крстосница на регионот на двата главни европски коридори – Коридорот 10 и Коридорот 8, рече Ковачевски.
Тој повтори дека проектот ќе отвори нови осум илјади работни места, инвестиции од 1,3 милијарди евра и номинален раст на БДП од 2 проценти на годишно ниво
