Шведска ги исполни условите кои ги постави Турција за да се приклучи во НАТО, изјави Тобијас Билстром, министерот за надворешни работи на оваа скандинавска земја.
Говорејќи на прес-конференција заедно со британскиот министер за надворешни работи Џејмс Клеверли, Билстром рече дека со воведувањето на новиот закон за тероризам, Шведска ги исполнила последните услови за пристапување во Алијансата договорени во трилатералниот план на Финска, Шведска и Турција.
„Во Шведска неодамна стапи на сила нов закон кој го криминализира учеството во терористичка организација на кој било начин, без оглед дали ја промовира, ја зајакнува или поддржува. Со ова ги исполнуваме последните делови од нашиот договор“, рече Билстром, пренесува Си-Ен-Ен.
