Полицијата уапси маж кој се обидел да киднапира дете на плажата Таламанка во истоименото одморалиште во близина на Ибица.
Граѓанинот на Мароко двапати се обидел да го земе детето откако го бакнал во образ, а на крајот бил фатен од полицаец кој не бил на должност кој слушнал како мајката на двегодишното девојче вриска, пренесува „Дејли мејл“.
Националноста на мајката и девојчето не се откриваат, а се соопштува дека осомничениот дал отпор при апсењето.
Портпаролот на Националната полиција на Балеарските Острови изјави: „Полицајците уапсија Мароканец осомничен за незаконско затворање, сексуален напад, отпор при апсење и непослушност, откако се обидел да земе двегодишно девојче на плажата во Ибица и ја бакнал во лицето“.
„Мажот, без очигледен мотив, го грабнал девојчето и почнал да ја бакнува во образот и не и давал да побегне. Во тој момент мајката на девојчето ја зграпчила ќерката и ја ослободила од стисокот на мажот. Таа отишла на друго место на плажата што е доста далеку од тоа место, но мажот им пришол и го грабнал девојчето повторно и отишол во морето со неа. Мајката почнала да вришти бидејќи тој не ја пуштал нејзината ќерка“, се вели во соопштението.
Во тој момент на помош дошол полицаец кој не бил на должност, кој бил на плажата и ги слушнал врисоците на мајката, кој успеал повторно да ја спои мајката со нејзината ќерка. Неколку пати му наредил на мажот да се оддалечи, но тој зазел насилен став и се нафрлил на полицаецот, кој морал да го држи додека не дојде дополнителна полициска помош.
„Осомничениот е уапсен за противправно лишување од слобода на малолетно лице, како и за кривични дела полов напад, отпор и непослушност“.
Таламанка е долга, закривена плажа со мек песок и плитки води, што ја прави одлична за безбедно пливање. Популарна е меѓу туристите од целиот свет, како и меѓу локалното население. На плажата има хотели со четири и пет ѕвезди и голем број вили. Добро позната онлајн веб-страница за патувања ја прогласи оваа плажа како едно од седумте најдобри места за посета на Ибица оваа година.
