Граѓаните на населба Лисиче продолжуваат со активности за да се спротивстават на Деталниот урбанистички план за ова населено место.
И во третата верзија на планот, општина Аеродром не се откажува од намерата во населба Лисиче да се градат згради.
Со последната измена на ДУП –от предвиден е уште еден парк, покрај првиот кој веќе беше предвиден, како и дополнително намалување на бројот на станбени објекти.
Со ова, како што велат од општина Аеродром, граѓаните кои живеат во овој дел на општината ќе имаат два нови парка, а за 90% намален број на станбени објекти во споредба со првата верзија на деталниот урбанистички план.
Но тоа не ги смирува жителите на ова населено место, чие ултимативно барање е воопшто да не се изгради ниту една зграда и како што најавија продолжуваат да се борат со сите правни средства.
„Ве повикуваме како и секогаш во што поголем број да поднесеме анкетни листови и кажеме НЕ на градежниот ХАОС кој ни се спрема! Предлог ДУП-от ќе биде изложен во ОУ Димитар Македонски каде што и ќе се поднесуваат анкетните листови. Да кажеме СТОП на градежниот хаос кој заедно сите може да го спречиме“ стои во објавата на Фејсбук страницата Да го зачуваме Лисиче.
Во коментарите на социјалните мрежи граѓани негодуваат што и оваа јавна анкета се одржува во период на летни одмори, но најавуваат дека нема да се откажат од борбата да спречат бетонизација на нивното место на живеење.
