Досега се уапсени околу 40 лица кои за време на директниот пренос на Инстаграм го поддржаа убиецот од Градачац, Нермин Сулејмановиќ, кој брутално уби три лица, неговата невенчана сопруга Низама Хеќимовиќ и Џенгиз и Денис Ондер, татко и син, турски државјани.
Ранети се полицаецот Хусеин Коториќ и граѓанинот Недим Памуковиќ, како и Хариса Ондер, сопруга на Џенгиз Ондер. Според последните информации, Хариса Ондер е во тешка состојба.
Убиецот во живо го пренесувал убиството на невенчаната сопруга. Многу луѓе во живо го поддржале. Министерот за внатрешни работи на Федерацијата Босна и Херцеговина, Рамо Исак за Аваз изјави дека се вршат активности за лоцирање на овие лица.
„Директорот на ФУП ме информираше дека Одделот за компјутерски криминал на ФУП веќе врши активности поврзани со евидентирање на лица кои на социјалните мрежи го поддржувале и величале убиството и убиецот“, рече Исак. ФУП во соработка со надлежното обвинителство ќе започне процес на лоцирање и документирање на сите лица кои преку своите објави ширеле омраза, дале поддршка, величале убиство и убиецот не само на Инстаграм туку и на сите други социјални мрежи.
