Не е мое да зборувам за тоа како тече процесот на уставни измени, но сметам дека просперитетот и безбедноста на Северна Македонија се во нејзиното пристапување кон Европската Унија, изјави американската амбасадорка во земјава Анџела Агелер од граничниот премин „Богородица“ каде што денеска оствари работна средба со министерот за внатрешни работи Оливер Спасовски. Одговарајќи на новинарски прашања во врска со процесот на уставни измени во земјава, Агелер кажа дека граѓаните треба да им дадат до знаење на политичките структури оти сакаат да бидат дел од ЕУ, а од друга страна, пак, политичарите од сите партии да работат во насока на интеграција на земјава во Унијата.
-Јас сум амбасадор на САД. Ние не сме дел од ЕУ, но кога ја гледам границата и големиот број возила кои влегуваат и излегуваат, сметам дека просперитетот и безбедноста на оваа држава се во нејзиното пристапување и интеграција во Европа и навистина се надевам дека политичарите од сите партии во земјава ќе работат кон остварување на тоа, изјави американската амбасадорка.
Таа додаде дека граничниот премин меѓу С Македонија и Грција потсетува на тешките одлуки што морала да ги направи земјава. Знам дека не е лесно, рече Агелер и додаде дека ги охрабрува граѓаните да им дадат до знаење на политичарите оти се за интеграција на земјава во ЕУ.
Американската амбасадорка Анџела Агелер денеска при работна средба со министерот за внатрешни работи Оливер Спасовски на ГП „Богородица“ ја претстави донацијата од САД составена од нови т.н. „боди камери“ за полициските службеници, како и на двете специјализирани возила за откривање радиоактивен материјал.
