Абдалах Талал Хамед, 27-годишниот фудбалер кој беше пријавен за исчезнат во понеделникот на 21. август, е пронајден жив и здрав во Унгарија, соопшти неговиот клуб Горица.
Играчот бил пронајден од унгарската полиција. Хамед го контактираше претседателот на ХНК Горица, Ненад Чренко, за да му се заблагодари на загриженоста, а тој подоцна ќе даде повеќе информации за случајот.
Да потсетиме, Хамед пред две недели од унгарски ЗТЕ од Залаегершег се пресели во редовите на хрватскиот прволигаш Горица, но во понеделникот неговиот нов клуб објави дека му се губи секаква трага. Хамед дошол во Будимпешта во саботата (19. август) за да ги земе своите лични работи и документите за регистрација за Горица.
Тој во понеделник околу пладне требало да замине за Велика Горица, но откако не пристигнал во Хрватска веднаш било пријавено неговото исчезнување во унгарската полиција. Таткото на Абдула, Талал Хамед Тали, изјави дека разговарал со својот син околу 11 часот и дека се подготвувал за преселба, но еден час подоцна шведскиот фудбалер престанал да одговара на повиците.
Мобилниот телефон му бил исклучен. Чувствувајќи проблеми, Тали веднаш одлетал во Будимпешта и дошол во станот на својот син. Неговиот автомобил се уште бил паркиран во гаражата. Тали повикала полиција која упаднала во станот и таму го пронашла пасошот на шведскиот фудбалер, но не и клучевите од станот и паричникот.
Летово, пред да потпише едногодишен договор со Горица, Абдула имал понуда од друг клуб. Уште кога требало да се реализира трансферот, шведскиот фудбалер се повлекол бидејќи другата страна не му изгледала доволно сериозна. Се чини дека тоа ги предизвикало сите проблеми.
„Двајца мажи дојдоа во хотелот каде што тој престојуваше во тој момент. Еден од нив се закани дека ќе го избоде со нож. Персоналот на хотелот повика полиција, која пристигна по неколку минути и ги одведе мажите. После тоа, мојот син се исплаши“, објасни таткото на фудбалерот за Афтонбладет.
Таткото вели дека Абдула, кој покрај шведскиот пасош има и пасош на Ирак бидејќи е роден во Ирак, набрзо бил повикан од лице кое тврдело дека го претставува клубот и барал 50.000 евра отштета за откажување на трансферот.
Фудбалерот одбил и тогаш почнале заканите. Талал Хамед Тали веруваше дека спорот за договорот е поврзан со исчезнувањето на неговиот син. Тој не го спомна името на клубот со кој неговиот син го договарал трансферот.
