Руската војска синоќа соопшти дека соборила неколку украински беспилотни летала на нејзина територија. Руската војска на Телеграм објави дека соборила три украински беспилотни летала над јужниот регион Брјанск, еден над централниот регион Орлов и еден во регионот Калуга, јужно од Москва.
Руските власти соопштија дека бил нападнат аеродромот Псков.
„Министерството за одбрана го одби нападот со дрон на аеродромот во Псков“, напиша гувернерот на Псков, Михаил Ведерников на апликацијата за пораки Телеграм.
Според првичните информации, нема повредени, рече тој.
„Како резултат на нападот со беспилотно летало, оштетени се четири авиони Ил-76. Избувна пожар и се запалиле два авиони“, јави руската новинска агенција ТАСС, повикувајќи се на итните служби.
Руските медиуми објавија снимка на која се гледа густ црн чад над аеродромот.
По известувањето за нападот со дрон, ТАСС објави дека воздушниот простор над московскиот аеродром Внуково е накратко затворен. Градоначалникот на Киев, Виталиј Кличко, пак, ги повика жителите на главниот град на Украина да останат во засолништа откако утрото се слушнаа експлозии во Киев.
