На „Штипската пастрмалијада” која годинава ќе се одржи на 22. и 23 септември, цената на популарните пастрмајлии ќе биде по 200 денари. Угостителите и организацискиот тим од Општина Штип денеска одржаа координативен состанок, на кој беше потврдено дека подготовката ќе биде по универзалниот стандард односно 250 грама тесто и 150 грама месо.
-Одржавме информативен состанок со угостителите коишто пројавија желба и интерес да учествуваат на овогодинешната „Пастрмалијада“ во Штип. Задоволни сме од интересот. На овој состанок беа утврдени неколку технички и организациони работи коишто ни претстојат да ги сработиме пред почетокот на манифестацијата. Утврдена е цена на пастрмалиите од 200 денари, изјави Александар Арсовски, член на организацискиот тим на Општина Штип.
Пастрмалиите ќе се продаваат на вкупно 29 штанда кои ќе бидат понудени од угостителите. Пријавите се поднесуваат до среда, а в четврток изборот ќе биде по минатогодишниот принцип „прв дојден, прв услужен“.
