Заменик министерот за одбрана Тирон Јајага денеска присуствуваше и се обрати на свеченоста по повод заклетва на 27. класа питомци и слушатели на Курсот за стручно оспособување и усовршување на офицери за потребите на Армијата во Касарната „Гоце Делчев” – Скопје.
Во своето обраќање пред присутните Јајага истакна дека и питомците и слушателите на Курсот за офицери кои денес дадоа свечена заклетва, започнуваат да чекорат по нова патека која е препознатлива по својата стручност, стандарди, дисциплина, но и дека со нивниот интерес да се приклучат во редовите на Армијата покажуваат дека неизмерно ја сакаат својата татковина.
Тој додаде дека токму тука на оваа престижна институција, Воената академија, на која се школуваат и питомци од Босна и Херцеговина од Косово и од Црна Гора, ќе се формираат во вистински лидери.
„Во периодот што следува ќе научите многу за воената професија и вашите видици ќе ги проширите во поглед на заштитата и безбедноста. Вие, ќе се соочите со разни предизвици при вашето образование кои ќе ве оформат во вистински лидери. Лидери кои знаат како да се грижат за безбедноста и мирот на своите граѓани и држава, но и пошироко”, потенцира заменикот министер Јајага.
Јајага го потенцира и стекнатото високо образование на слушателите кои го започнуваат Курсот за офицери за потребите на Армијата, е многу значајно за нашата Армија. „Верувам дека вашето искуство од факултетските денови ќе придонесе со голем успех да го завршите овој шестмесечен Курс и понатаму како офицери да дадете свој значаен придонес во унапредување и развој на капацитетите на Армијата.” Деканот на Воената академија, полковник Митко Богдановски упати честитки до секој поединец за храброста и одлучноста да се избере патот на воената професија, уникатна можност која не е лесно достапна за другите.
„Ви посакувам успех во школувањето, непоколеблива решителност во извршување на задачите и постигнување на извонредност, дисциплина и почит кон вашите професори, претпоставени и колеги, кои целата своја кариера ја посветиле на образовниот процес, чиј дел сте и вие сега”, рече полковникот Богдановски.
На денешната свеченост присуствуваше и директорот на Генералштабот на Армијата, генерал Симеон Трајковски, претставници од воено дипломатскиот кор, гости од Босна и Херцеговина и Црна Гора и роднини и пријатели на питомците и слушателите.
Оваа година на воената академија Генерал „Михаило Апостолски” како дел од 27. класа се запишани 41 питомец од кои 34 од Северна Македонија (21 мажи и 13 жени), 4 питомци од Босна и Херцеговина и 3 питомци од Црна Гора, а на курсот за стручно оспособување и усовршување на офицери за потребите на Армијата на Република Северна Македонија ќе бидат 30 слушатели од кои 19 мажи и 11 жени.
