Арапските сојузници на Израел го обвинија за експлозијата во која загинаа најмалку 200 луѓе во комплекс на болница во Газа. Израелските одбранбени сили во неколку наврати го негираа нападот и објавија снимки за кои тврдат дека потврдуваат дека ИДФ не биле инволвирани.
Обединетите Арапски Емирати и Бахреин, кои и двете воспоставија врски со Израел со Абрахамскиот договор од 2020 година, го осудија нападот врз болница во Газа со стотици жртви и за тоа го обвинија Израел.
„Обединетите Арапски Емирати силно го осудуваат израелскиот напад… што резултираше со смрт и повреди на стотици луѓе“, соопшти денеска официјалната новинска агенција.
Министерството за надворешни работи на Бахреин „изрази остра осуда од Кралството Бахреин за израелското бомбардирање“, соопшти Бахреинската новинска агенција.
Мароко, друга земја што го призна Израел во 2020 година, исто така го обвини за нападот, како и Египет, кој стана првата арапска земја што ги нормализираше односите во 1979 година. Египетскиот претседател Абдел Фатах ал-Сиси најостро го осуди „израелското бомбардирање“ на болницата Ахли Арап, што доведе до „смрт на стотици невини жртви“ меѓу палестинските граѓани во Газа. Тој го нарече „намерното бомбардирање“ „јасно кршење на меѓународното право“.
