Роднините на околу 240 луѓе кои ги држеше палестинската група Хамас во Газа ги повикаа денеска екстремно десничарските израелски претставници да не ја спроведуваат предложената смртна казна за заробените палестински милитанти, велејќи дека дури и зборувањето за тоа може да ги загрози заложниците.
Израелското Министерство за правда на 7 ноември соопшти дека работна група разговарала за тоа како да им се суди на приведените Палестинци со цел да се наметнат „казни сразмерни на сериозноста на извршените злосторства“.
Екстремно десничарскиот министер за национална безбедност Итамар Бен-Гвир повика на смртна казна, која постои во израелскиот закон.
Некои роднини на луѓето заробени од Хамас во Газа се загрижени дека дебатата за смртната казна може да предизвика одмазда.
Хамас веќе им се закани на заложниците со егзекуција поради воената офанзива што Израел ја започна како одговор на нападот на 7 октомври.
Израелските безбедносни сили уапсија двајца вооружени напаѓачи кои преминале во Израел за време на нападот на Хамас, соопшти денеска израелската полиција.
Израелските власти не го објавија целосниот број на Палестинци приведени поради инфилтрација. Армијата соопшти дека заробила повеќе од 300 Палестинци од вооружените групи во Газа кои биле донесени во Израел на испрашување.
Единствената смртна казна извршена во Израел беше егзекуцијата на осудениот нацистички воен злосторник Адолф Ајхман во 1962 година.
Израелските воени судови, кои често постапуваат во случаи во кои се вклучени Палестинци, имаат моќ да изрекуваат смртна казна со едногласна одлука на тројца судии, иако оваа опција никогаш не била спроведена.
