Две лица починаа, а најмалку 99 се разболеа во епидемија на салмонела добиена од дињи и исечено овошје забележана во 32 држави во САД, соопшти американскиот Центар за контрола и превенција на болести (ЦДЦ).
Агенцијата за јавно здравје на САД во петокот сподели „предупредување за безбедност на храна“, истакнувајќи дека во Минесота биле пријавени два смртни случаи и дека случаи на салмонела биле пријавени во вкупно 32 држави.
Од најмалку 99 луѓе кои се разболеле, 45 се хоспитализирани. Најмногу болни биле пријавени во Аризона, Мисури, Охајо, Висконсин и Минесота.
Епидемијата е поврзана со повеќе брендови на овошје – конкретно цели дињи, претходно исечените дињи и претходно исечени други овошни производи.
„Вистинскиот број на заболени луѓе во оваа епидемија е веројатно многу поголем од бројот пријавени, а епидемијата можеби не е ограничена само на државите со познати заболени“, забележа ЦДЦ. „Ова е затоа што многу луѓе закрепнуваат без медицинска нега и не се тестираат за салмонела. Покрај тоа, заболени можеби сè уште не се пријавени бидејќи обично се потребни 3 до 4 недели за да се утврди дали болното лице е дел од епидемија“.
Заразените со салмонела доживуваат симптоми како што се дијареа, треска и грчеви во стомакот. Според ЦДЦ, здравствените власти во Канада, исто така, го истражуваат избувнувањето на слична епидемија.
ЦДЦ претходно објави дека бактериите на салмонела предизвикуваат околу 1,35 милиони инфекции, 26.500 хоспитализации и 420 смртни случаи во САД секоја година.
