Шефот на Светската здравствена организација рече дека е речиси невозможно да се подобри „катастрофалната“ здравствена состојба во Газа, дури и ако помине итна мерка на СЗО. Мерката, поддржана од Авганистан, Катар, Јемен и Мароко, бара пристап до Газа за медицински персонал и залихи, како и СЗО да го документира насилството врз здравствените работници и пациентите и да обезбеди средства за обнова на болниците.
-Морам да бидам искрен со вас: овие задачи се речиси невозможни во сегашните околности – изјави директорот на СЗО Тедрос Аданом Гебрејесус, пренесуваат медиумите.
Тедрос му рече на 34-члениот комитет во Женева дека здравствените потреби во Газа експлодираа и ризикот од болести се шири, додека во исто време здравствениот систем е намален на една третина од неговиот предвоен капацитет. Болниците во Газа се под силни воздушни напади, а некои се под опсада или нападнати како дел од одговорот на Израел на нападот на Хамас на 7 октомври.
Оние кои остануваат во болниците се преплавени од бројот на луѓе кои доаѓаат, а операциите често се прават без анестезија. Базата на податоци на СЗО покажува дека од 7 октомври досега имало 449 напади врз здравствени установи на палестинските територии. Тедрос предупреди дека безбедносната ситуација ќе го отежне исполнувањето на барањата на комитетот и изрази длабоко жалење што Советот за безбедност на Обединетите нации не гласаше за повикот за прекин на огнот во Појасот Газа.
– Снабдувањето со здравствените установи стана исклучително тешко и сериозно е загрозено од безбедносната ситуација на терен и несоодветното снабдување надвор од Газа.
Палестинскиот министер за здравство, Маи ал-Каила, во обраќање преку видео врска зборуваше за хроничниот недостиг на лекови. „Итноста на ситуацијата не може да се пренагласи“, рече таа. Американскиот претставник во комитетот најави дека нема да се спротивстави на текстот на предлогот, што значи дека за него може да се гласа подоцна во недела. Израел го критикуваше, велејќи дека премногу малку се фокусирал на тоа што Хамас користи цивили како жив штит и поставува командни центри во болниците.
-Ако оваа средба служи за каква било цел, тоа ќе биде да ги охрабри акциите на Хамас – изјави израелскиот амбасадор Меирав Ејлон Шахар.
Итните сесии на СЗО се ретки и се одржуваат за време на здравствени кризи, вклучително и пандемијата на ковид-19 од 2020 година и епидемијата на ебола во Африка во 2015 година.
