Австрија нема да се согласи да се започнат преговори со Украина за пристапување во ЕУ под сегашните услови, изјави федералниот канцелар Карл Нехамер за време на состанокот со членовите на Националниот совет во главниот Комитет за ЕУ прашања на австрискиот парламент.
„Австрија секогаш ја поддржувала европската интеграција на земјите од Западен Балкан. Сега, како знак на солидарност, на Украина и на Република Молдавија исто така треба да им се понуди перспектива за пристап“, рече Нехамер и остро се спротивстави на „брзата процедура“ за двете држави.
Дополнително, нагласи тој, потребни се и внатрешни реформи на ЕУ доколку Унијата сака да биде „способна“ за проширување, се вели во соопштението објавено на веб-страницата на Собранието.
„Австрија нема да се согласи на преговори за пристапување во ЕУ со Украина под сегашните услови, а особено не треба да има фаворизирање кон Украина во однос на Босна и Херцеговина“, рече Нехамер како одговор на прашањата на пратениците на ФПО, Петра Штегер, Кристијан Хафенекер и Аксел Касегер,соопшти прес-службата на австрискиот парламент.
Австриската канцеларка потсети и дека претседателката на Европската комисија, Урсула фон дер Лајен, не се консултирала со премиерите на земјите-членки пред да го покрене прашањето за перспективата на преговорите со Украина за влез во ЕУ.
Тој посочи дека Австрија се уште е на линија со ЕУ кога е во прашање солидарноста со Украина, но без да ја наруши неутралноста. Станува збор пред се за финансиска помош за одржување на интегритетот на Украина, додаде тој.
Прес-службата на Националниот совет соопшти дека темата за почеток на преговорите за пристапување на Украина во Европската унија предизвикала дебата во парламентарната комисија, каде што биле поканети канцеларот Карл Нехамер и шефот на Министерството за надворешни работи Александар Шаленберг.
Десничарската популистичка Партија на слободата на Австрија (ФПО) се спротивстави на преговорите со Украина пред ЕУ, а исто така ја повика австриската влада да стави вето на зголемувањето на повеќегодишната финансиска рамка на ЕУ, вклучувајќи го и фондот за Украина.
На 8 ноември, Европската комисија му препорача на Европскиот совет да ги отвори преговорите за пристапување на Украина и Молдавија во ЕУ.
Таа, исто така, препорача, под одредени услови, отворање на преговорите со Босна и Херцеговина и доделување статус на земја кандидат за Грузија.
Европскиот совет на 14 декември треба да го разгледа прашањето за почеток на преговори за пристапување на Украина во ЕУ.
