Вицепремиерката задолжена за политики за добро владеење Славица Грковска, во рамките на Конференцијата на земјите потписнички на Конвенцијата на Обединетите Нации против корупцијата, одржала состанок со координаторот на Стејт Департментот на САД за глобално спречување на корупцијата, Ричард Нефју.
Вицепремиерката Грковска, како што соопшти владината прес-служба, му се заблагодарила на координаторот Нефју за поддршката што САД и ја дава на Република Северна Македонија, особено во однос на имплементација на политиките за добро владеење, реформите во правосудството, како и јакнење на капацитетите на правосудните органи.
Грковска го информирала Нефју дека на нејзина иницијатива е започната постапка за промена на Законот за рестриктивни мерки, во кој ќе се вклучат и правните акти на САД, по што македонските институции ќе имаат можност да преземат ефикасни мерки по објавувањето на конкретни имиња на листата на санкции на САД, за што веќе наредната недела ќе заседава работната група што таа ја предводи.
Вицепремиерката информирала дека во тек е и подготовка на друго законско решение, кое исто така ќе биде врзано со листата на санкции на САД, а кое ќе обезбеди друг вид на конкретни санкции.
Координаторот Нефју ги поздравил напорите на вицепремиерката Грковска за креирање на ефикасни механизми во справувањето со корупцијата.
Тој упатил јасна порака дека Соединетите Американски Држави ќе продолжат да ги поддржуваат напорите на Република Северна Македонија за превенција на корупцијата, вклучително и со мерки кои овозможуваат одговорност за оние кои им штетат на граѓаните и иднината на земјата.
Двајцата соговорници, како што е наведено во соопштението, разговарале и за потребата од зајакнување на капацитетите на судскиот систем во делот на справувањето со корупцијата и организираниот криминал, при што заклучиле дека тоа треба да биде еден од стратешките приоритети на нашата држава за наредниот период.
Вицепремиерката Грковска информирала дека во завршна фаза е и подготовката на Законот за конфискација на имот во граѓанска постапка, за кој веќе се одржа јавна расправа и добиено е мислење од Европската Комисија, по што следи имплементирање на забелешките.
