Јужноафриканската Република објави дека повеќе од 50 земји изразиле поддршка за нејзината тужба до Меѓународниот суд на правдата во која го обвини Израел за геноцид врз Палестинците во војната во Газа.
Други, вклучително и САД, силно ги отфрлија наводите на Јужна Африка дека Израел ја прекршува Конвенцијата на ОН за спречување и казнување на злосторството геноцид. Многумина не се огласија.
Реакцијата на светот на постапката пред Меѓународниот суд на правдата во Хаг покажува предвидлива глобална поделба кога станува збор за 75-годишниот проблем меѓу Израел и Палестинците.
Во Европа само муслиманската Турција јавно ја изрази својата поддршка. Ниту една западна земја не изрази поддршка за обвинувањата против Израел.
САД, близок сојузник на Израел, ги отфрли како неосновани, Велика Британија ги нарече неоправдани, а Германија рече дека „експлицитно ги отфрла“.
Кина и Русија малку зборуваа за еден од најважните случаи, кој ќе се најде пред меѓународниот суд.
