Нивото на шеќер во крвта е одраз на различни елементи. Покачениот шеќер може да биде последица на консумирање големи количества преработени јаглехидрати, како и лоши животни навики.
Храната не е единствената причина за висок шеќер во крвта, иако кога ќе помислите на нивото на гликоза во крвта, првото нешто на што веројатно помислувате е колку шеќер јадете.
Внесувањето на јаглени хидрати исто така игра значајна улога во нивото на шеќер во крвта. Без разлика дали се работи за овошје, житарки или слатки, тие на крајот се разградуваат и метаболизираат во гликоза. Јадењето големи количини на јаглени хидрати, особено храната со додаден шеќер и без влакна, го преплавува крвотокот со гликоза и може да предизвика драматично зголемување на шеќерот во крвта.
Сепак, тоа не е единственото нешто што влијае на нивото на гликоза.
Други навики кои немаат врска со тоа што или колку јадете, исто така, влијаат на тоа како телото го регулира шеќерот.
Стресот
Кога сме под стрес се ослободуваат хормоните адреналин и кортизол. Во стресни ситуации, ослободувањето на овие хормони ја зголемува будноста и производството на енергија – што значи дека шеќерот во крвта ќе се зголеми, но во овие краткорочни ситуации, тој скок на енергија е всушност пожелен. Треба да бидете будни и полни со енергија за да се справите со секоја стресна ситуација. А кога ќе се отстрани причината за стресот, нивото на овие хормони се враќа во состојба на мирување и сè повторно е избалансирано.
Проблемот настанува кога стресот не исчезнува.
Стресот од работата, финансиските грижи, врските, родителството и секојдневните непријатности исто така предизвикуваат лачење на овие хормони. Хронично високите нивоа на кортизол може да предизвикаат хронично високи нивоа на шеќер во крвта.
Што можете да направите за тоа? Обидете се да вклучите начини поддржани од науката за да помогнете во управувањето со стресот во вашиот живот.
Лош сон
Спиењето влијае на шеќерот во крвта на неколку начини. Недостатокот на сон може да поттикне зголемување на нивото на кортизол во текот на денот, односно зголемување на гликозата и да го спречи телото да го намали високиот шеќер во крвта.
Недоволното спиење може да ги наруши вашите хормони за глад и може да забележите дека сте погладни во текот на денот и помалку сити после јадење.
Што да направите за ова? Оптималната количина на сон за повеќето луѓе е помеѓу седум и девет часа сон во текот на ноќта. Избегнувајте да гледате во екраните еден час или повеќе пред спиење и намалете ја температурата во спалната соба.
Недоволна физичка активност
Неправилното движење е поврзано и со зголемено ниво на шеќер во крвта. На мускулите им е потребна енергија за да се движат за време на вежбањето и ако можат, ќе црпат гликоза од крвта за гориво. Во 2022 година, истражувачите открија дека пешачењето или дури и стоењето две до пет минути во рок од еден час или два после јадење е доволно за да има значително влијание врз нивото на гликоза во крвта. Поинтензивното вежбање има уште поголем ефект.
Како можете да го промените тоа? Не седете долго, особено не веднаш после јадење. Прекинете го денот со кратки прошетки низ куќата или соседството и задолжително вклучете подолги кардио вежби и вежби за сила во вашата неделна рутина.
Времето кога јадете
Она што го јадете не е секогаш клучот за нивото на шеќер во крвта. Важно е и кога јадете. Телото има тенденција да биде метаболички поактивно наутро, што значи дека е поподготвено ефикасно да ја разградува храната, да ја исчисти гликозата од крвта и потоа да ја користи. Јадењето доцна навечер, непосредно пред спиење, е повеќе поврзано со претерана и продолжена реакција на гликоза во крвта отколку дури и јадење ист оброк само четири часа порано истата вечер.
Што можете да направите за тоа? Вечерата е обично најголемиот оброк во денот за повеќето вработени луѓе, затоа размислете да го преместите порано или да го ставите најголемиот дел од внесената енергија за појадок и ручек. А кога вечерате, нека биде порано и храна без многу јаглехидрати.
