Европската унија треба да размисли за користење на профитот од замрзнатите руски средства за купување воена опрема за Украина, изјави денеска претседателката на Европската комисија Урсула фон дер Лејен.
„Време е да започнеме разговор за користење на неочекуваните профити од замрзнатите руски средства за заедничко купување на воена опрема за Украина“, навела таа во Европскиот парламент, пренесе „Ројтерс“.
Претседателката на ЕК во својот говор ја повика ЕУ да направи повеќе за одбранбената политика и најави презентација на првата европска индустриска стратегија за одбрана во наредните денови, пренесува „Анса“.
„Во срцето на одбранбената стратегија, мора да постои едноставен принцип: Европа мора да троши повеќе, да троши подобро, да троши на европски начин“, нагласи Фон дер Лејен.
Претседателот на Европската комисија додаде дека една од главните цели ќе биде приоритетот на заедничките набавки во одбранбениот сектор.
„Исто како што направивме со вакцините или природниот гас“, објави таа во Европскиот парламент.
