Како резултат на обилните дождови и поплавите што ја погодија Кенија, најмалку 13 лица загинаа, а околу 15.000 луѓе се раселени, соопштија ОН.
Канцеларијата на ОН за координација на хуманитарни прашања, повикувајќи се на кенискиот Црвен крст, соопшти дека загрозени се речиси 20.000 луѓе, вклучително и околу 15.000 раселени поради обилните дождови и поројните поплави низ целата земја.
За време на поплавите во претходните сезони на дождови, илјадници луѓе загинаа во оваа источноафриканска земја, а областите во близина на езерата и низводно од главните реки беа најпогодени.
Здружението на Црвениот крст на Кенија изјави за Асошиетед прес дека пет главни патишта се отсечени поради поплави, вклучувајќи го и патот Гариса во северна Кенија, каде автобус со 51 патник беше однесен од поројниот дожд во вторникот, а нема информации за жртви.
Кениската агенција за справување со катастрофи издаде предупредување за поплави до жителите на окрузите Ламу, Тана и Гариса лоцирани низводно од реката Тана, откако поплавите ги пробија браните нагоре.
На жителите од овие области им беше препорачано да се евакуираат на повисоките места.
Досега, девет од 47 окрузи во земјата пријавиле проблеми поради поплави, додека свлечишта се забележани во централните региони на земјата.
Според метеоролозите, сезоната на дождови што е во тек се очекува да го достигне врвот на крајот на април и да заврши во јуни.
