„Првото прашање кога ме носеа во соба по царски рез беше: Имате ли клима? Медицинските сестри само се насмеаја и рекоа да се навикнам на жештината“, е исповедта на една од родилките која за време на топлотниот бран што ја зафати Србија, закрепнува на четвртиот кат на Гинеколошко-акушерската клиника „Народен фронт“ во Белград.
На истиот кат е и Одделението за високо ризични бремености, а според сведочењето на читателките кои ја одржуваат бременоста или се породиле тука, нема клима. Родилките кои стапија во контакт со Н1 наведуваат дека жени паѓаат во несвест, дека бебињата се „комирани“, а вентилаторите во собите „се на крајот на силите“.
„Ние буквално 24 часа лежиме на кревет со завои на нозете и се потиме како говеда. Буквално лежиш, а потта ти се лизга низ челото“, е исповедта на една од родилките.
Н1 по тој повод и се обрати на клиниката, но не доби одговор дали има клима, дали со оглед на искуствата на родилките се планира да се постават дополнителни. Првиот човек на ГАК „Народен фронт“ Жељко Миковиќ на 11 јули за Нова изјави дека „стариот и познат проблем е старата и дотраена клима“.
„Градиме стадиони, ЕКСПО, но не можеме да сервисираме клима“
Уредничката на порталот Бебац, Јелена Ќириќ Николиќ, смета дека ситуацијата не е добра и дека сите треба да погледнеме и да им се извиниме на сите бебиња кои моментално се раѓаат во Србија.
„Затоа што очигледно не бевме способни да купиме нови клими или да ги сервисираме“, изјави таа за Н1.
Неодржувањето, како што вели, е синоним за систем кој пропаѓа, за гнилежот што постои во сите здравствени установи во Србија.
„Се јавуваат мајки од цела Србија, не е проблем само климата, туку сега поради жештините акцентот е ставен на тоа, бебињата да спијат, жените не можат да дишат и треба да закрепнат од породувањето“, истакнува таа.
На сè што сме сведоци, како што вели, е нехумано.
„Сите ги слушаме советите на лекарите, знаеме што е топлотен удар, а сите здравствени работници ги одвојуваат бебињата од мајките и ги носат во неклиматизирани простории кои ги има многу малку. Како општество треба да размислиме што е приоритет. Градиме стадиони, ЕКСПО, но не можеме да купиме клима, не можеме да сервисираме клима …“, оценува таа.
Како што заклучува, или се работи за апсолутна негрижа или во прашање е недостиг на пари, а пари мора да се одвојат за новороденчиња.
Виновен е системот и оние кои не одвојуваат средства од буџетот, додава соговорничката на Н1.
Н1 Србија
