5-мина осуденици од затворот Скопје во Шутка претпладнево се уште се во бегство и ги нема во келиите, потврди за Телма директорот на затворот Филип Андов.
4-ца затвореници недостасуваат од понеделникот наутро кога при проверка било утврдено дека не се во затворот.
Еден затвореник го нема од петокот.
Додека затворениците се во бегство, новиот директор на Управата за извршување на санкции Александар Пандов го обвини актуелниот директор на Шутка, Андов дека примал мито од затворениците и овозможувал трансфери во работни единици каде веќе имало доволен број на осудени лица.
Андов најави дека ќе му поднесе тужба за клевета на Пандов и со контранаводи го обвини дека непрофесионално постапил, им се јавувал на затвореници по телефон наместо да ја извести полицијата поради што предизвикал бегство на 4 затвореници.
Директорот Пандов пак побара истрага од обвинителството откако при вонреден надзор на затворот во петокот навечер откри дека недостасуваат 11 затвореници.
Пандов ни изјави дека во моментот има инспекција во затворот која ќе утврди што точно се случува со осудените лица кои се во бегство.
