Инвестицијата од 400.000 евра, добиени од УЕФА за изградба на стадион во Велес, на крајот заврши како потрошен капитал во мизерни услови, со терен обраснат со трње и кал. Идејата зад овој проект беше да се создаде простор за младите спортисти, но спортскиот терен што требаше да стане место за тренинг и натпревари, денес стои запоставен пишува алсат.мк
„Овој стадион требаше да биде симбол на новиот спортски живот во Велес, но младите сега можат да го гледаат само однадвор, како споменик на неисполнетите ветувања“, вели еден од локалните спортисти кој трча во близина.
Стадионот е целосно опкружен со висока ограда, што го прави невидлив за случајните минувачи. Тревата, која некогаш требаше да биде дел од добро одржуван терен, сега е обрасната со трње и ниска вегетација. Според сведоштвата на граѓаните, стадионот е во оваа состојба веќе пет години, без знаци на обновување.
Иако надлежните институции тврдат дека до пред една година стадионот се одржувал, локалното население ја негира таа верзија, посочувајќи дека објектот е запуштен уште од самата негова изградба. Граѓаните на Велес се огорчени поради пропустите и ја доведуваат во прашање оправданоста на вложените средства од УЕФА.
Сомневањата за неправилности при реализацијата на проектот се сѐ поголеми. Според изјавите на одговорните, постојат основани сомневања дека парите не се целосно наменети за изградба и одржување на стадионот. Властите најавуваат истрага за евентуална злоупотреба на фондовите, а исходот од истрагата може да има далекусежни последици за одговорните лица.
