Обединетите Нации денеска испратија 19 камиони со хуманитарна помош во сириската област Идлиб, јави агенцијата Анадолија.
Камионите го поминаа турскиот граничен премин „Чилвеѓозу” во јужната област Хатај.
Помошта ќе биде дистрибуирана до оние на кои им е потребна во Идлиб и неговите рурални подрачја.
Турција и Русија минатиот септември се договорија да го претворат Идлиб во зона на деескалација на судирите, каде што дејства на агресија се строго забранети, потсетува агенцијата. Сириските власти и нивните сојузници сепак постојано ги прекршуваат условите за прекин на огнот, и често извршуваат напади во зоната без судири.
Во деескалациската зона во моментот живеат околу четири милиони цивили, вклучувајќи стотици илјади раселени лица.
Во Сирија се води жестока војна од почетокот на 2011 година, кога Башар ал Асад презеде строги мерки кон продемократските протести.
