Возачот на Ферари, Шарл Леклер е задоволен од болидот и убеден дека тимот е подготвен за нови победи.
– Момците во Маранело завршија одлична работа со изградбата на болидот за оваа сезона. Подготвуваме некои нови ставки и не се сомневам дека ќе бидат чекор во вистинската насока. Затоа, не би обрнувал премногу внимание на противниците, треба да се фокусираме на себе. Ферари сега има многу подобра база на податоци за области каде што треба да се подобри. Во текот на изминатите две години, навистина видов скок во анализата на секој викенд. Ги идентификувавме слабостите, брзо реагираме и се обидуваме да ја подобриме ситуацијата. Така што јас сум уверен во тимот и во префинетоста на болидот, изјави Леклер.
Тој проговори за тоа како го доживува лидерството во првенството со удобна разлика.
– Се најдов во оваа ситуација во јуниорската серија, но во Формула 1 тоа значи многу – особено по последните неколку сезони, особено во Ферари. Неверојатно чувство. Се разбира, расположението малку се промени – сега разбрав дека пилотирам болид што може да победи. Нема потреба да преземате големи ризици или да правите нешто посебно за да освоите висока позиција. Треба само да си ја работам работата, истакна Леклер.
По три трки во сезоната 2022, Леклер е лидер во поредокот на возачи во Ф-1 шампионатот со 71 освоен бод, пред Џорџ Расел од Мерцедес кој собра 37 и Карлос Сајнц од Ферари со 33.
