НАТО има голема улога во обезбедување на европската иднина на Западен Балкан, а закочениот процес со недоделување датум за старт на преговори со ЕУ за Северна Македонија и Албанија е „уназадување” и „огромна грешка”, порачаа дипломати и експерти на панел во Атлантскиот совет.
Блокадата за старт на преговори беше сериозно уназадување за двете земји, изјави Александар Вершбоу, поранешен заменик на генералниот секретар на НАТО и бивш амбасадор на САД во Русија.
– Се надевам дека ова е само привремено одлагање на процесот, а на стратегиско поместување на ЕУ, спротивно евроантлантските интеграциии на земјите во Западен Балкан, во кои е вклучена и Србија, изјави амбасадорот.
Тој укажа дека со тоа што американскиот Сенат го ратификува влезот на Северна Македонија во НАТО и останува уште неколку земји да го сторат истото, влезот на нашата земја во воената алијанса треба да се случи најдоцна до наредната пролет.
-Во интерес на Европа е сите овие држави да го следат патот, кои други веќе го поминаа, да ги исполнат потребните реформи што ќе го направи Западниот Балкан многу постабилно место и ќе ги намали шансите за руско влијание, додаде тој.
Италијанскиот амбасадор во САД, Армандо Варикио, рече дека ветото на ЕУ за Северна Македонија е погрешна одлука и побара поголема политичка ангажираност од страна на европските земји од Медитеранот.
-Одлуката да не се отворат преговори со Албанија и Северна Македонија, кратко и јасно, е огромна грешка. Предизвиците овде не се поединечи или национални, туку мултидимензионални и мултинационални. Колку повеќе работат заедно сите земји од Медитеранот, подобро е, порача Варикио.
Според нив НАТО и Европската Унија треба да развијат заедничка стратегија на југот од Европа. Брисел да се фокусира на прашањата како владеење на право, невработенст, инфлација и развој, а НАТО на изградба на безбедносни капацитети.
Со заедничка инвестиција во технолошки можности, заклучија тие, евроатлантските сојузници би можеле да се справат со влијанието на Русија и Кина.
