Данил Медведев тргна одлично во финалето со Рафаел Надал на Австралијан Опен, но не успеа да дојде до втората Грен Слем титула и доживеа пораз во меч со пет сета.
Русинот ја загуби психолошката војна со големиот шпански борец и публиката, а по мечот истакна дека е тажен и дека тешко му е да најде зборови со кои може да го опише натпреварот кој го одбележа петчасовна борба.
„Тешко е да се најдат зборови по ваков тежок натпревар од пет часа. Честитки за Рафаел Надал, чест беше да се игра против него. Рафа, ти си неверојатен шампион. По мечот прашував дали си уморен, дали си жив после се? Нивото беше доста високо. Голема благодарност за сите кои беа со мене и ги преживеаја тешките моменти на терен. Со мене овде е сопругата, ама дома кај мене сега телевизорот сигурно е искршен. Ќе се обидам да бидам подобар следниот пат“, изјави Медведев.
Данил Медведев во својата кариера има една освоена Грен Слем титула, во финалето на УС Опен во кое лани го совлада Новак Ѓоковиќ.
