Се поголем број мигранти последниот месец се обидуваат илегално да влезат од Србија во Унгарија, изјави шефот на кабинет на унгарскиот премиер, Ѓерѓерли Гуљаш.
-Вкупно 11. 808 лица се обиделе годинава илегално да влезат во Унгарија, а 2.418 од нив тоа се обиделе да го сторат во последниот месец, рече Гуљаш. Тој наведе дека мигрантите сега користат нова техника за пробивање на оградата што Унгарија ја крена пред четири години, при првиот мигрантски бран по таканаречената Балканска маршрута, пренесуваат унгарските медиуми. Полицијата открила два тунела што мигрантите ги користеле да минат под оградата, рече Гиљаш и додаде дека тунелите се веќе затворени од граничната стража.
