На просторот каде сега се наоѓаат бараките на Град Скопје во Градскиот парк, ќе се прави монтажен паркинг со капацитет од 600 до 900 возила, а на покривот од истиот ќе има спортски игралишта. Маркичката за деловен простор на оваа парцела, со приземје, 5 ката и поткровје, се брише со новиот Детален урбанистички план Градска четврт 3 12- локалитет Парк 1 и дел од Дебар Маало 2, кој го направи Општина Центар, во рамките на процесот на ревидирање на урбанистичките планови. Планот од 20 јануари е изложен на јавна анкета, која ќе трае до 31 јануари, а в понеделник ќе се одржи јавна презентација.
Оваа локација, со одлука на Владата на Никола Груевски на 5 август 2016 година, е прогласен од посебен интерес за државата и со планско-урбанистичка документација просторот е пренаменет во деловен објект со висина од 25 метри. Со новиот план, по барање на Град Скопје овој дел добива намена јавен простор односно паркинг. Каде ќе се пресели администарцијата од Град Скопје сеуште не е познато.
