Бојан Маричиќ, секретарот за меѓународна соработка на СДСМ, во емисијата на телевизија 24 откри дека минатото лето ВМРО ДПМНЕ имале шанса да прифатат јавниот обвинител против организиран криминал и корупција да го предлага опозицијата, но низ преговорите станало јасно дека на ВМРО ДПМНЕ не му е важно кој ќе го избере обвинителот, туку како да прекине процесуирањето на предметите на СЈО.
„Проблемот со законот се знае што е, на ВМРО-ДПМНЕ единствено му е важно како да се затворат предметите, како поинаку да се сфати нивното однесување. Како можеме да имаме решение кога од другата страна на преговарате со луѓе кои се засегнати од иднината на предметите. Еве, ги повикувам утре, нека дојдат во 11 часот во собранието и нека ги изнесат своите предлози. Два дена ВМРО ДПМНЕ се повикува на ставовите на експертите при јавната дебата во парламентот за да се одбрани зошто не го гласа законот. Затоа, ако имаат искрен пристап сите тие забележки на експертите ќе ги преточат во предлози или амандмани и ќе аргументираме”- изјави Маричиќ.
Очекувањата на СДСМ се дека сите пратеници, политички партии и пратенички групи ќе најдат начин како да се стигне до функционален закон затоа што рокот за донесување на законот изминува.
„Врвен патриотски чин е да се гласа законот и за државата и за граѓаните кои очекуваат правда и владеење на правото. Верувам дека сите ќе бидат одговорни. Една година преговараме со опозицијата, но ако само ви го наметнуваат затворањето на предметите на СЈО како главен и единствен предлог, тогаш нема договор. Време е да се знае на кого може да смета државата и на кого можат да сметаат граѓаните и кој сака правда и правна држава”- изјави Маричиќ.
Тој ги наброја петте точки кои се отворени за дискусија, и кои доминирале во јавната дебата во парламентот, а имаат врска со рокови, докази, прислушуваните материјали, критериуми за избор и за лична или институционална одговорност.
„Сите експерти во однос на спорните прашања беа на линија со ставовите на СДСМ, туку дали ВМРО ДПМНЕ има став за законот. Цел година им прифаќавме предлози, и таман ќе прифатиме серијал, тие на следниот состанок предлагаа нови и така во недоглед, но со една цел, да си ги спасат криминалците. Ќе нагласам уште еднаш законот овозможува силно и независно обвинителство, професионални обвинители и гонење на сите кривични дела и како можеме да очекуваме дека другата страна го сака сето ова кога тие ќе треба кривично да одговараат пред таквото обвинителство”- заклучи Маричиќ.
Утре е денот кога ВМРО ДПМНЕ има шанса да предложи амандмани, конкретни забелешки, за да може Владата веднаш да постапи по содржината на законот и следната седмица законот да се најде пред пратениците усогласен од сите партии. Маричиќ праша како законот ја блокира правдата, теза која неуспешно ја наметнува ВМРО ДПМНЕ.
„Круцијална цел на ВМРО ДПМНЕ е како да го спаси криминалот. Затоа извртува тези и ја манипулира јавноста, каков што е примерот со завршните одредби кои предвидуваат дека самите обвинители ќе направат анализа колку обвинители им фалат и да се објават конкурси, а не како што тоа го преставува ВМРО ДПМНЕ дека политиката ќе има влијание”- заврши Маричиќ.
