Швајцарското обвинителство поднесе обвинение против поранешните претседатели на Меѓународната фудбалска федерација (ФИФА) Сеп Блатер и на Унијата на европските фудбалски асоцијации (УЕФА) Мишел Платини, за измама и други кривични дела. Обвинителството во изминативе шест години истражуваше случај за исплата два милиона долари, откако Блатер, како прв човек на ФИФА, тие пари му ги дал на Платини за консултантска работа извршена од 1998 до 2002 година.
На двајцата ќе им се суди во следните неколку месеци.
„Оваа исплата ја оштети ФИФА и доведе до незаконско збогатување на Платини“, се вели во соопштението на швајцарскиот федерален обвинител.
Истрагата, која беше покрената во септември 2015 година, влијаеше на прераното заминување на Блатер (85 г.) од позицијата прв човек на ФИФА, додека Платини (66 г.), тогаш првиот човек на УЕФА, мораше да се повлече од кампањата за претседател на ФИФА. Блатер и Платини негираа дека направиле нешто незаконско, повикувајќи се на устен договор што го постигнале пред повеќе од 20 години. Блатер е обвинет за измама, лошо управување, проневера на средства на ФИФА и фалсификување документи. Платини е обвинет за измама, проневера, фалсификување и соучесништво во лошо управување.
