Од 3 до 10 проценти од пациентите со Ковид-19 повторно биле позитивни на коронавирусот откако биле излекувани и отпуштени од болница, откриле лекарите во Вухан, објави „Саут Чајна Морнинг Пост“.
Истражувачите ширум светот се обидуваат да утврдат дали закрепнените пациенти сè уште можат да заразат други луѓе со коронавирус и дали имаат развиено антитела кои им нудат имунитет на болеста.
Лекарите од болницата „Тонџи“ во Вухан, каде лани во декември првпат се појави вирусот, за телевизијата CCTV изјавиле дека не пронашле докази дека пациентите кои повторно биле позитивни на вирусот станале заразни, а тоа го утврдиле врз основа на набљудувања на членовите на нивните семејства и лабораториските тестови.
И покрај релативно малиот процент, истражувањето на болницата „Тонџи“ е особено важно бидејќи Кина сега има далеку повеќе закрепнети пациенти отколку нови потврдени случаи.
Во Кина се излекувани над 90% од заразените пациенти, а околу 4.300 сè уште се на лекување во болниците. Вкупната бројка на заболени е 81.340, а бројот на смртни случаи 3.292, но повеќето од новите случаи се увезени.
Ванг Веи, претседател на болницата „Тонџи“, изјави за CCTV дека од 147 излекувани пациенти што ги проучувале, само пет – или нешто повеќе од 3 проценти – биле повторно позитивни.
Во меѓувреме, магазинот за здравје „Лајф Тајмс“, оваа недела објави дека карантинските установи во Вухан објавиле дека околу 5 до 10 проценти од нивните излекувани пациенти биле позитивни откако повторно се тестирале.
Овие податоци отворија прашања за тоа дали тестовите со нуклеинска киселина може да не се точни во откривање на траги од вирусот кај некои од закрепнатите пациенти.
Ванг за CCTV изјави дека петте пациенти од неговата болница кои повторно биле позитивни немале никакви симптоми, а ниту еден од членовите на нивните семејства или луѓе со кои имале близок контакт не е заразен.
Тој рече дека нема докази дека излекуваните пациенти кои повторно се позитивни ќе бидат заразни за другите.
„Досега нема докази кои индицираат дека тие се заразни“, рече Ванг, додавајќи дека надзорот над други пациенти покажал дека околу 80 до 90 проценти од нив немаат никаква трага на коронавирусот во нивната крв еден месец откако биле отпуштени од болниците.
Анализата на друга група од 15 пациенти од болницата, исто така, потврди сличен тренд, при што никој не ги заразил членовите на нивните семејства.
„Овие се само мали примероци и не се доволни за да нè уверат во валидноста на нашите први наоди“, рече Ванг. „Ни треба голема епидемиолошка студија“, додаде тој.
Сепак, тој рече дека е важно за излекувани пациенти да останат во изолација две недели по отпуштањето од болница за да можат повторно да бидат тестирани за потврда.
