Европа се загрева побрзо од светскиот просек, а новите податоци укажуваат дека минатата година била најтопла од започнувањето на мерењето, според Светската метеоролошка организација.
Според европските податоци кои потекнуваат од Климатската служба на ЕУ „Коперникус“, 11 од 12-те најтопли години во Европа од почетокот на мерењата биле по 2000 година.
Топлото време и топлотните бранови во текот на летото предизвикаа суша во многу делови на централна Европа минатата година, пренесува Би-би-си.
Во многу делови на континентот температурите биле за 3 до 4 Целзиусови степени повисоки од вообичаеното.
Сето ова е во корелација со количината на сончева светлина што ја зафати Европа минатата година. Бројот на сончеви часови е најголем забележан досега.
Земајќи ги сите податоци заедно, може да се види јасен тренд на затоплување во текот на изминатите четири децении.
Професорот Руан Сатон од британскиот Национален центар за атмосфера наведува дека две причини се клучни.
„Првата е дека копнените области се загреваат побрзо од океанот, а втората е намалувањето на одредени видови загадување на воздухот, што придонесе за неодамнешното затоплување на Европа, особено во текот на летото“, рече Сатана.
Научниците се загрижени дека просечната температура во Европа во последните пет години во просек се зголемила за два степена во однос на прединдустриската ера.
Се претпоставува дека пандемијата на коронавирус може привремено да ја запре емисијата на стакленички гасови, но научниците предупредуваат дека треба да се направи многу повеќе за да се запрат загрижувачките трендови.
„Загадувањето е намалено по падот на економските активности, но јаглерод диоксидот не исчезнува преку ноќ“, предупредува професорот Даниел Шмит од Универзитетот Бристол.
