Првиот удар на коронавирусот на северната земјина хемисфера е издржан, со застрашувачки број на заболени и жртви. Со предупредување на експертите, многу земји се подготвуваат за втор бран на вирусот Ковид-19, кој се очекува на есен. Колективен имунитет се уште нема во доволна мера, а развојот на вакцината е во тек.
Додека во одделни делови на Европа веќе се преземени првите чекори кон враќање на животот во нормала, одделни земји во светот се подготвуваат за евентуален втор бран.
Вакви подготовки има во Германија, каде припадниците на војската во болница претвораат еден берлински саемски центар, додека една петина од креветите на одделенијата за интензивна нега ќе останат како резерва за евентуално повторување на вирусот на есен.
Како оружје во борбата против новиот бран во иднина ќе служи и мобилната апликација наменета за следење на контактите со заразените лица.
Специјалните болници, кои во Велика Британија се изградени за борба против коронавирусот, остануваат на располагање, а како што изјави еден од портпаролите на владата, изградбата на нови и натаму е во тек.
Како што пренесува АП, Франција планира новоизградените одделенија за интензивна нега да бидат подготвени за втор бран на вирусот, а здравствените власти велат дека земјата двојно го зголемила бројот на кревети за интензивна нега во екот на сегашната епидемија на над 10.000.
На претпазливост поради можно прерано укинување на рестриктивните мерки повикаа и германската канцеларка Ангела Меркел и британскиот премиер Борис Џонсон.
Во некои земји веќе е забележан повторен пораст на бројот на заразени, еден таков случај, покрај Германија е и Сингапур, наспроти успехот кој таму беше постигнат во сузбивањето на пандемијата во раната фаза.
Кина, која моментално има контрола над ситуацијата, од есен ќе мора да спречува, односно да го држи под контрола продорот на коронавирусот на својата територија преку луѓе кои ќе доаѓаат од странство, изјави лидерот на еден експертски тим од Шангај, Жанг Венхонг.
