Подготвен сум да заминам во секое време. И заради мене, не сакам да има тензии на кој било начин. Јас не сум Радев да се радувам кога луѓето се тепаат на улиците и ги затвораат раскрсниците, изјави бугарскиот премиер Бојко Борисов.
– Ако сме толку силни и обединети, што е проблемот да има привремена влада. Ќе предложам опции, вклучително и јас да ја напуштам и да ја продолжам владата, истакна Борисов.
Како што пренесува агенцијата БГНЕС, тој додаде дека сака да разговара со неговите колеги и пријатели за сè што направиле.
– Не сакам државата да биде поделена. Никогаш не сме правеле коалиција со Движењето за права и слобода (ДПС) и никогаш нема да правиме. Нема да дозволам таква коалиција, истакна Борисов.
Според него, „ниту еден ден повеќе не треба да се остане во власта, ако луѓето не ве сакаат”.
Тој најави многу разговори. – А оние што зборуваат, само ќе ги потсетам на пристапувањето на Бугарија во банкарската унија и во еврозоната. Олигарсите се многу лути за ова. Нема да можат да банкротираат банки, нема да можат да повлекуваат пари во кеш, затоа ќе ме компромитираат, но, како што гледате, тоа не ми пречи многу, истакна Борисов.
Тој смета дека е најпроверуваниот политичар во Бугарија во текот на сите овие години и дека чувствува тензија во општеството заради посакуваното чувство за правда.
– Единствено што не направивме е да номинираме кандидат за главен обвинител. Не стои мој потпис под указот на претседателот Радев за именување главен обвинител, туку негов. Јас, заедно со вас, победив на избори 11 пати по ред. Трипати со привремена влада. Последниот му припадна на претседателот Радев. Не се плашиме, но не му веруваме на Радев. Немаме проблем со привремената влада. Без привремена влада, не може да се земат заеми ако економијата блокира. Не може да се прогласи вонредна состојба. Доколку се открие вакцина, само Националното собрание може да ратификува договор за нејзино купување. Без Националното собрание нема да има државен буџет за 2021 година. Ако јас сум причината, си одам веднаш, истакна Борисов.
Тој притоа порача да не се подлегнува на провокации.
Речиси цел месец се одржуваат антивладини протести во Бугарија. Учесниците во протестите бараат оставка од Владата и од главниот обвинител Иван Гешев, како и распуштање на Парламентот.
