Дофрлања од место, довикувања, аплаузи во собраниската сала за време на денешната расправа за изборот на членовите на собраниските тела. Ова следеше откако пратеничката од редовите на ВМРО-ДПМНЕ Гордана Силјановска Давкова од говорницата посочи дека кадрите што
влегуваат во комисиите треба да имаат познавања од областа каде што се поставени и предложи за сите нив Собранието да има увид во нивните професионални биографии по примерот на Словенија.
Некој од пратениците од власта изреагира гласно по што таа се налути обраќајќи им се со зборовите:
-Не климајте со глава, немате појма од право, рече Давкова.
По ова следеше аплауз од пратениците од опозицијата, а оние од власта продолжија да дофрлаат од собраниските клупи, а Силјановска продолжи во истиот контекст:
-Што се замислувам- професор „honoris causa“. И Ве молам од место да не комуницирате, така вели Претседателот. Но, не невообичаено тоа, да имаме такви кадри, кога еве денеска имаме 67 подготвени само за кревање рака, рече Силјановска Давкова.
На препирањата на Силјановска и пратениците од власта, интервенираше спикерот Џафери кој обраќајќи и се на пратеничката рече дека таа нема право да ги класифицира пратениците по образование и стручност затоа што се избрани од граѓаните.
-Немате право да оспорите право на друг пратеник. Без оглед на што мислевте, немате потреба да му се обратите на пратеник и да му кажете дека нема појма од право. Имавме претседател на комисија со електро-технички факултет и не гледам спорно ништо, тука. Немате право да се
мешате во изјаснувањето на пратениците. Кој е „за“ , кој ќе крене рака, нормално, а ако има копче ќе притисне на него. Не сме на Правен факултет, а доколку имаме потреба, ќе ве бараме за совет. Избрани сме од граѓаните, и тие имаат единствено право да го отповикаат нашиот мандат, рече
Џафери обраќајќи и се на Силјановска.
