Претседателот на Република Северна Македонија, Стево Пендаровски, денеска оствари виртуелна средба со делегација на Асоцијацијата на поранешни членови на Европскиот парламент (FMA).
Делегацијата е составена од 15 поранешни членови на Европскиот парламент од Германија, Италија, Франција, Велика Британија, Шпанија, Грција и Словенија и е предводена од Ханс-Герт Потеринг, актуелен претседавач со Асоцијацијата и поранешен претседател на Европскиот парламент.
На средбата беа разменети мислења и информации околу евроинтеграцискиот процес на Република Северна Македонија и напредокот во клучните реформски области, како и за актуелните случувања во ЕУ од аспект на пандемијата на Ковид-19.
Претседателот Пендаровски изрази задоволство од континуираната и принципиелна поддршка што ја добива нашата земја од Европскиот парламент и истакна дека со оглед на постигнатиот напредок, Северна Македонија заслужува и е подготвена да ги отпочне пристапните преговори за членство во Европската унија, a интегрирањето на Северна Македонија и на земјите од Западен Балкан во Европската Унија е во интерес на регионалната безбедност и просперитет.
Поранешните европратеници ги поздравија заложбите на претседателот Пендаровски за градење на добрососедски односи со сите соседни држави и посветеноста на регионалната соработка и имплементирањето на европските стандарди во земјата.
Виртуелната средба на претседателот Пендаровски со европратениците е дел од програмата – Студиска посета на Северна Македонија со цел промоција на конструктивен дијалог и поддршка на парламентарната демократија.
