Европскиот суд за човекови права го одби барањето на турските власти за укинување на привремените мерки за случајот Ерменија против Турција, донесени со одлука на Судот на 6 октомври 2020 година, јави дописникот на МИА.
Судот од Стразбур на 6 октомври 2020 одлучи по втор пат да го примени членот 39 од неговите правила во врска со конфликтот во Нагорно-Карабах. Судот ги повика сите држави директно или индиректно вклучени во овој конфликт, вклучително и Турција, да се воздржат од какво било дело што би придонело за кршење на правата што Конвенцијата за човекови права им ги гарантира на цивилите и да ги почитуваат нивните обврски согласно со Конвенцијата.
На 7 октомври 2020 година, турската Влада побара од судот да ја преиспита својата одлука и да ја укине привремената мерка преземена против Турција.
Судот од Стразбур потсетува дека укажувањето на привремена мерка според член 39 од неговиот деловник е итна мерка што може да се преземе во ситуации кога смета дека постои непосреден ризик од непоправлива штета. Индикацијата за таквата мерка е од привремена природа и не прејудицира за последователно испитување на допуштеноста или за основаноста на случајот во контекст на можни спротивставени постапки.
Одлуката од 6 октомври 2020 година беше донесена од Судот врз основа на докази кои укажуваат на тоа дека државите договорнички (во Конвенција) биле директно или индиректно вклучени во конфликтот. Одлуката не е адресирана само до Турција, туку до сите засегнати држави.
По испитувањето на приговорите формулирани од турската влада и повторно земајќи ја предвид сериозноста на конфликтот и ескалацијата што ја доживува, Судот не гледа причина да ја измени својата одлука и делумно да ја укине посочената привремена мерка.
