Малави е среде најлошата епидемија на колера во својата историја, соопшти денеска Светската здравствена организација (СЗО), информирајќи дека се потврдени повеќе од 1.200 смртни случаи.
Од избувнувањето на болеста во јужноафриканската земја пред речиси една година, имало 1.210 смртни случаи од колера и речиси 37.000 заразени, соопшти СЗО. Сите 29 административни области на Малави се погодени.
Колерата е ендемична во земјата со 20 милиони жители од 1998 година, но претходно секогаш беше ограничена на сезонски епидемии за време на сезоната на дождови од ноември до мај.
Сепак, сегашната епидемија, која започна на 3 март 2022 година, се прошири и на сушната сезона, вели СЗО.
Владата на Малави прогласи здравствена криза на почетокот на декември, поради тековната сезона на дождови, големото географско ширење на болеста и постојано високата стапка на смртност од повеќе од 3 проценти.
СЗО соопшти дека бројот на заразени нагло се зголемил во јануари, а здравствениот систем во земјата е веќе преоптоварен.
Според СЗО, епидемијата во Малави се јавува во позадина на светскиот пораст на епидемијата на колера, што ја ограничи достапноста на вакцини, тестови и третмани.
Колерата е акутна бактериска цревна инфекција која се пренесува преку нечиста вода за пиење или храна.
Болеста лесно се лекува со лекови, но ако не се лекува, може да предизвика откажување на бубрезите и смрт поради значително губење на течности
